ملک تیزی سے نیچے جا رہا ہے، اثرات تمام اداروں پر پڑیں گے، عمران خان
ملک تیزی سے نیچے جا رہا ہے، اثرات تمام اداروں پر پڑیں گے، عمران خان
The country is going downhill fast, Imran Khan
چیئرمین تحریک انصاف عمران خان کا کہنا ہے کہ ملک جس تیزی سے نیچے جا رہا ہے اس کے اثرات تمام اداروں پر پڑیں گے۔
لاہور میں تحریک انصاف معاشی ٹیم کے اجلاس میں اظہار خیال کرتے ہوئے سابق وزیراعظم کا کہنا تھا کہ نیشنل سیکیورٹی پالیسی کا ایک پہلو ملٹری اور دوسرا معیشت ہے، نیشنل سیکیورٹی کی پالیسی ہم نے ہی بنائی تھی۔
چیئرمین پی ٹی آئی کا کہنا تھا کہ موجودہ صورتحال میں عدلیہ سمیت تمام اداروں کو بھی اپنا کردار ادا کرنا چاہئے۔ سب سے کہہ رہا ہوں آواز بلند کریں، ملک تیزی سے نیچے جا رہا ہے اگر آواز بلند نہیں کریں گے ہم تو سب اس کے ذمہ دارہوں گے۔
انہوں نے مزید کہا کہ ہماری برآمدات میں کمی واقع ہوتی جا رہی ہے، اس وقت سب سے زیادہ پریشان کاروباری طبقہ ہے مگر پاکستان کی بزنس کمیونٹی کی خاموشی پر حیرت ہے۔
عمران خان کا کہنا تھا کہ ہمارے آخری مہینے میں 27 فیصد صنعتی ترقی ہوئی تھی جو آج صفر ہے۔ کسانوں کے پاس پیسہ آیا تھا، بے شمار موٹرسائیکلیں فروخت ہوئیں، ریکارڈ برآمدات ہوئی تھیں، کسانوں نے ریکارڈ منافع کمایا، پاکستان کی ریکارڈ برآمدات ہوئی تھیں۔
Source: SAMAA News